जळगाव: आगामी विधानसभा निवडणुकांच्या पार्श्वभूमीवर शिवसेना ठाकरे गटाचे नेते खासदार संजय राऊत जळगाव जिल्ह्याच्या दौऱ्यावर आले. यावेळी त्यांनी जळगाव ग्रामीणसह पाच जागा लढवण्याची घोषणा केली. गुलाबराव पाटील यांच्यावर केलेल्या एका टीकेत राऊत यांनी म्हटले की, "त्याला कोण रेडा म्हणतो, आम्ही डुकरे मारत नाही."
राऊत यांनी मंत्री गुलाबराव पाटील यांना थेट आव्हान देत सांगितले की, "तुम्ही आमची चिंता सोडा. आम्ही उमेदवार आयात करू, मात्र गुलाबराव पाटील यांचा पराभव नक्की करू." यामुळे जळगाव ग्रामीण विधानसभा मतदारसंघात ताणतणाव निर्माण झाला आहे.
गुलाबराव पाटील यांनी याआधी संजय राऊत यांच्यावर टीका करताना सांगितले होते की, "राऊत जळगावमध्ये आले असताना रेड्यांना मारण्यासाठी तलवार तयार आहे." राऊत यांच्या उत्तरात, "त्याला कोण रेडा म्हणतो," असे त्यांनी स्पष्ट केले.
पत्रकार परिषदेमध्ये बोलताना राऊत म्हणाले की, महाविकास आघाडीच्या जागावाटपाबाबत अद्याप ठोस निर्णय घेतलेला नाही, परंतु जळगाव ग्रामीण मतदारसंघाची जागा उद्धवसेना मशाल याच चिन्हावर लढवली जाईल.